Txintxarri Abesbatza

Gaur Otsailak 19-a, Ostegun Gizena dugu, hau da Iñauterietako hasera. Mozorro, festa eta jai giro artean txaranga soinu alaiak entzungo ditugu…

Egun hauetan tabernetan, dendetan. komunikabideetan… entzungo diren doinuak 1.998. Kilometroetako egitasmoen barruan izan zen grabatua Amasako Izeta estudioan. Ohiko Iñauterietako doinu ezagunak, euskaratzeko asmoarekin, Cd bat atera zen: Iñauteriak kantu-kantari izenarekin.

Bertan Tolosako Musika Banda, Laskorain Ikastola, Hodeiertz, Leidor, Abeslari Lagunak eta gu geu, Txintxarri Abesbatza izan ginen grabaketa lanetan. Esperientzi polita izan zen. Orduko oroigarri ondorego audioa. Hain zuzen ere Pastelero kantu ezaguna.

Eguberrietan Batiste Zabala Bedaiotarrak abesturiko Gabon koplak jarri genituen. Altxor polita iruditu zitzaigun eta gaurko honetan, egun honetan bertan berari mingainetik tiraka aritu ondoren, ondorengo kopla hauek abestu zizkigun eta guk grabatu.

Oroimenean gordeta dauzkan bertso hauek Arantzazuko Ama Birjiña azaldu zenekoaz ari da.

Ea gustatzen zaizkizuen…

Arratsaldeko euriak ez zigun beldurtu, eta gure artilezko galtzerdiak eta abarkak lehor ibilitzea lortu genuen. Ez da gutxi, arratsaldeko euri jasa ikusi eta gero. Barrioko plazan elkartu eta aurreneko “dios te salbe“ak kantari hasi ginen. Barrio alde bat pasa, kolegiora iritsi eta Azpeitiarren etxean urteroko sagardoa tragoa intxaurrekin gustora jan edan genituen… Eiderren trikitixa hotsekin gustora ibili ginen kalejiran. Eskerrikasko Eider.

Beste barrio aldetik barrena, Txanberin ere izan ginen. Handik zubia igaro eta Kale Beherara joan ginen eta handik kaleta behetik gora zeharkatu plazan, plazan azken kanta abestu ta gero. Kafen Tomasek ateraratko ardo tragoarekin eztarri busti eta sozidadera afari legea egin asmoz.

Aurtengoa ere bete dugu. Hurrengo urtean berriro. Hurrengo urtean, gure korua 50. aldiz aterako da Santa Ageda Bezperan. Korua sortu zenetik urtero atera izan ohi baikara kantu eskean.

Etzi, Otsailak 4, Santa Ageda Bezpera dugu. Hau da kantu eskean ateratzeko eguna. Aspaldidanik datorren ohitura da eta guk zintzo zintzo mantentzen saiatzen garena. Artzai andrez jantzi, makilak eskuan, trikiti hotsaz lagunduta eta maindire zuria zabalduta, hor izango gara iluntzeko 19.30tatik aurrera betiko kantu eskean. Garai batean gurdi batekin ateratzen omen ziren. Hala jendeak, dirua eman beharrean, jan edanak ematen omen zizkieten. Gero hauekin afari merienda bat egin ohi zutela. Zerbait sobratuz gero ongizate etxeren batera eramten omen zituzten.

Ohitura honen jatorrian teoria desberdinak daude. Batzuek diote ohitura paganoa dela, beste bazuk kristautasunetik datorrena, beste batzuk neguko lozorrotik natura esnatzen hasteko ohitura… Argi dagoena da, oraindik Euskal Herriko txoko askotan mantentzen den ohitura dela. Bera, hor izango gara gu ere zuen balkoi azpitik kantari. Gusto baduzue…